Tun hnaiah Aizawla Synod Office chuan kalphung thar a nei a, Kohhran hriatpuina tel lovin lehkha leh thil pawimawh dang he office atang hian a lak theih tawh loh.
Thu dawn danin, tun hnaiah Synod Office atang hian mi thenkhatin rilru dang daih puin lehkha pawimawh te an lo lachhuak thin a, chu chuan harsatna a thlen avangin Synod Office hian kalphung thar an nei ta a ni.
Mizoram Presbyterian Kohhran hmunpui, Aizawl-a Synod Office hian July ni 20 khan 'Office Circular' an chhuah a, chutah chuan he office dawrtute'n Kohhran lehkha an keng emaw Kohhranin a hriatpui emaw a nih loh chuan lehkha leh 'document' pawimawhte lo pek tawh loh tur a nih thu a inziak.
"Synod Office hi a duh duhin an dawr thei a, Kohhran mi ni lo pawhin an dawr thei a. A kal apiang hi an zalen a, sorkar office te anga mipui hriat loh tur chi pawh a awm lo a ni ber a.
Amaherawhchu Kohhran mi tirh anga insawi a awm theih a, an sawi ang ni lova thil dang daih atana hman tuma office thil pawimawh lachhuak te pawh a awm theih a. Chuvangin fimkhur thu-ah file thil pawimawh leh 'document' pawimawhte la tur chuan Kohhran hriatpui hi a ngai a ni," tiin Synod Office enkawltu pakhat chuan a sawi.
"Document pawimawh a awm a, archive te pawh kan nei a. A duh chuan an rawn pan a, a theih ang angin kan lo pui a. Chutiang chu a la tih theih reng a, amaherawhchu Kohhran tirh anga insawia Kohhran thil lak chhuah ve mai te a awm thei a, chutiang chu thil dang daihah te pawh an lo hmang thei a. Chutiang laka invenna tur lam hawi chu a ni," tiin Office Circular an siam chhan a sawi bawk.
Thu dawn danin, tun hnaiah mai pawh rilru dang daih pu-a Synod Office a\anga thil pawimawh la an awm zeuh zeuh a, khawi bial Pastor Quarters tur emaw chanchin ngaihvena a design leh plan vel te dil, chumi neih hnua revenue deptt.-a lo va kalpuia buaipui ta chiam te pawh an awm.
Tun hnaiah bawk Pastor-te hming leh awmna hmun a kimchanga Synod Office atanga dil chhuak an awm bawk a, thudawn danin, he thil latute hian branch KTP chanchinbu enkawltu anga insawiin, an chanchinbu chu 'ordained minister' zawng zawng a thlawna thawn an duh avanga he thil hi mamawh angin an insawi a ni.
Mahse a hnu lawkah he thil latute hian eng KTP Chanchinbu mah an lo enkawl lo tih Synod Office lam hian an hre leh tih thu dawn a ni.